BARUGANAN: "Balak ni Juan"
Nagbukal na ang kawa sa politika;
Ang uban nagbuwag, ang uban naghiusa;
Kaniadto higala, karon kontra;
Kaliwat ni Juan, nagkawatakwatak na;
Naglibog, nabahin, ang uban nagpabutabuta;
Pastilan kining politika…
Panahon sa kompanya, saad pwerteng daghana;
Saad nga pagkalami, pagkahumot, mura ug tinuod;
Aboton ko ang langit, buwan ug mga bitoon;
Libakero, Libakera, lapukon nga kinaiya igsoon;
Unsaon na lang, mga butbot ug panghimaraot;
Pastilan kining politika…
Kasagaran walay konsensiya, walay baruganan;
Sa huyuhoy nagpaanodanod, sama sa kawayan;
Hurus sa hangin, naglagiting, adto paling;
Pastilan kining politika…
Ang uban nagpasilong sa payong sa mga halangdon;
Magukoyukoy, kang Lolong hangyo pakiluoy;
Nanghinaut nga unta sila malampuson ug madaugon;
Sa bugno sa mga malimbungon ug bakakon;
Pwera lang sa mga tarong ug ligdong igsoon;
Pastilan kining politika…
Kung ako ang inyo pangutanon… BARUGANAN higala;
Hashasi silang tanan, bukikia ang ila tinaguan;
Iladlad ang mga saad, hinuktuki ang abilidad;
Ang Baruganan, Ang Mithi, ug ang Binuhatan;
Kini ang labing hinungdanon… Matngon Lungsuranon!
pna/03/25/2013
No comments:
Post a Comment