MATAG KALIRING SA ADLAW

Matag kaliring sa adlaw;

Nagkahait, nagkainit ang ligid sa politika;

Pagkadaghan sa dughan daw gikulata;

Dili masabot ang kahinam nga gibati;

Daghan ang gabutokbutok sa kalagot;

Ang uban nanghimaraut ug nanghinaot;

Nga ako, ikaw, kitang tanan masukamod;

Mga himantayon ug mga matumutumoon;

Matag kaliring sa adlaw… Nagkainit… Nagkahait.

Daot diri, daot didto, saway diri, saway didto;

Gadilaab, gakayo maora ug Santilmo;

Gadaiyang matang sa kaisug ug kalagot;

Gisinggit, gipadayag ang kahiubos;

Ang uban nagpaukoukon kay nahadlok;

Adunay nagpanuko kay kuno naikog;

Giluom, gitak-um para ingnon hilomon;

Ipaagi nalang sa utot ug sekreto ibagutbot;

Matag kaliring sa adlaw… Nagkainit… Nagkahait.

Kining tanan nasaksihan ni Juan;

Gipaminaw ug gihinuktukan, gitisuk sa alimpatakan;

Ang mga saad ug pasalig para sa kalamboan;

Kaugmaon sa tanan kada adlaw gihisgutan;

Apan si Juan nga nagilaid sa kalisdanan;

Kakha tuka, sama sa manok nga binuhian;

Boto maoy bugtong hait nga hinagiban;

Pagpuo sa babag, pagpapas sa mga hinungdan;

Pagsumpo sa mga nagpasagad ug naghikaw;

Niining damgo sa uyamot nga kausbawan;

Matag kaliring sa adlaw… Nagkainit… Nagkahait.