PAGBUTYAG O PAGPADAYAG

Pagbutyag O Pagpadayag

Hinagiban kini sa usa ka Lungsuranon nga mituo nga siya adunay kagawasan sa pagbutyag o pagpadayag sa iyang gibati ug hunahuna pinaagi sa mga pulong nga mabasa ug madungog. Igong kaisog ug kahibalo gikinahanglan kini sa pagbutyag sa mga butang nga may kalambigitan sa mga pangandoy sama ni Juan.

Pagduhaduha, pagukon-ukon, ug ang pagkamanggiuwawon mga babag kini sa pagpadayag sa hunahuna hilabi na ang kakulang sa kaisog. Kay lagi paryente, igso, kumare, kumpare, silingan, higala, kabit, o’ hinigugma ba hinuon, mga babag usab kini sa pagpadayag… batasan sa kinaiyahan, babag sa kalamboan.

Ang dili pagpadayag aron ingnon nga buotan ug diyosnon, nga walay mansa sa kaugalingon, usa usab kini sa mga babag sa pagkab-ot sa damgo sa mga kabos ug timawa. Gilihay nimo ang imo kaugalingon sa pagpanday sa mga butang nga unta adunay kalambigitan sa kaayuhan ug kangil-aran… mga butang nga maoy mag-umol sa kaugmaon natong tanan.

Ang pagpakahilom tungod sa kinaugalingon nga rason, sama ra nga gihikawan mo ang imo kaugalingon sa katungod sa pagdamgo sa ugma nga malamboon. Basola ang imo kaugalingon kung ikaw naa sa kawad-on kay gumikan sa imong pagpakahilom nauyamot kining lungsod sa Catmon… Ikaw ang hudas sa mga lungsoranon.

Ang kakulang sa kahibalo, wala kitay mahimo, usa sab kini sa mga babag sa pagpagawas sa hunahuna. Kinahanglan na gayud nga kita magmata, pukawon ta ang mga nahikatulog, lamdangan ta ang mga nagpakaaroningnon, ug giyahan ta ang mga buta ug bungol. Kitang tanan managhiusa, ipalanog ta ang konsensya alang sa kalamboan ug kalinaw sa atong mahal nga lungsod… Pagkaanindot Higala… Kung May Konsensya.

Ipadayag Ang Konsensya… Puohon Ta Ang Laksot Nga Kinaiya… Mga Hudas Sa Uyamot Nga Katilingban.